سیمه ییز چارواکي: طالبانو بادغیس ته د ترکمنستان وارداتي برېښتا پرې کړې

د بادغیس ولایت سیمه ییز چارواکي وایي چې طالبانو څلور ورځې مخکې یاد ولایت ته د ترکمنستان وارداتي برېښنا پرې کړې او دغه راز یې د مخابراتي شبکو فعالیتونه هم محدود کړي دي. په ورته وخت کې د یاد ولایت اوسېدونکي بیا حکومت پر کم کارۍ او دغه ولایت ته پر نه پاملرنې تورنوي او وایي د برېښنا پرې کېدو له ګڼو ستونزو سره مخ کړي دي. د ولایتي شورا غړی عبدالعزیز بیک بیا وایي، ددې ستونزې د حل یوازینۍ لار قومي مخور او سپین ږېري دي څو وسله والو طالبانو ته په یو شکل قناعت ورکړي. بل لور ته د یاد ولایت والي عبدالغفور ملکزی وایي، د برېښنا او مخابراتي شبکو ستونزه یې جدي نیولي او ژمنه کوي چې ژر تر ژره به ورته رسېدګي وکړي. طالبانو تر اوسه په دې اړه څه نه دي ویلي.

ارزښت را در صفحات اجتماعی دنبال کنید !